Poetry

હા કબુલ્યું ગુપ્તચર હું,
નામ બદલી
મૌનનાં કાળાં રહસ્યો પામવા
ભટકું અહીં
છું છદ્મવેશે.
છંદના ખંડેરમાં બેસું કદી
બાવો બની,
લયની સૌ ભઠિયારગલીઓમાં
સદા ભૂખ્યાનો કરતો ડોળ
રખડું.
હાઈકુના સત્તરે અક્ષર મહીં
સંકેત કરતો,
ફૂંક મારી દઉં ગઝલના કાનમાં
એકેક ચપટા શબ્દના પોલાણને,
અંદર જય જોઉં તપાસું,
સહેજ પણ શંકા જો આવે કોઈને તો
અર્થના નક્શાઓ ચાવી જાઉં.
હા કબૂલ્યું ગુપ્તચર હું.

~ “આદિલ” મન્સૂરી